Џорџ Расел извојува фантастична пол-позиција на квалификациите за Големата награда на Азербејџан, додека неговиот тимски колега од Мерцедес и лидер во генералниот пласман, Кими Антонели, доживеа вистински кошмар откако се заби во заштитниот ѕид и утрешната трка ќе мора да ја започне дури од 16. позиција.

Британецот ги оддува ривалите во завршниот дел од квалификациите со време од 1:42.526, оставајќи го Шарл Леклер од Ферари зад себе со речиси цела секунда задоцнување. Третото место му припадна на Оскар Пјастри од Мекларен, кој беше поспор од Леклер за несфатливи 0.001 секунди. Со овој резултат, Расел добива колосална можност драматично да ја намали негативата од 81 бод во однос на Антонели во борбата за шампионската титула.

Големата драма на уличната патека во Баку се случи уште во првата сесија (Q1). Антонели ја закачи заштитната ограда во првата кривина, го уништи предниот лев дел од болидот и беше принуден да запре. Иако неговото претходно постигнато време беше доволно за премин во следната фаза, механичарите на Мерцедес немаа време да го санираат оштетувањето, па Италијанецот го заврши настапот. Разочарувачки квалификации имаше и Макс Ферстапен, кој по најбрзиот круг на третиот тренинг, на крајот се избори за скромното осмо место.

Одличен враќање зад воланот на Ред Бул имаше Исак Хаџар со освоено четврто место пред Ландо Норис и Луис Хамилтон на шестата позиција. Во првите десет се пласираа уште и Пјер Гасли, Карлос Саинц и Франко Колапинто.

Трката за Големата награда на Азербејџан се вози во сабота, каде што Расел ја има убедливо најдобрата стартна позиција да го искористи киксот на својот тимски колега, додека Антонели ќе ги преживува сите ризици на пробивањето од задниот дел на колоната.