Маркос Љоренте влезе во својата осма сезона во дресот на Атлетико Мадрид, но сè поизвесно е дека таа би можела да му биде и последна на „Метрополитано“. Додека Диего Симеоне и раководството на мадридскиот клуб работат на продолжување на соработката, германскиот гигант Баерн Минхен спрема план да го украде одличниот универзалец без обештетување. Покрај Баварците, ситуацијата внимателно ја следат и премиерлигашите Ливерпул, Манчестер Сити и Челси.

Откако пристигна од редовите на градскиот ривал Реал Мадрид во летото 2019 година за 30 милиони евра, Љоренте израсна во еден од клучните столбови на Атлетико со 308 настапи, 37 гола и 45 асистенции. По освојувањето на светската круна со Шпанија, тој донесе неочекувана одлука на 32 години да стави крај на репрезентативната кариера за да му овозможи повеќе време за одмор и регенерација на своето тело.

За својата одлука да и каже збогум на „фуријата“, Љоренте отворено им се обрати на навивачите:

„Знам дека многумина од вас нема да ја разберат оваа одлука и веројатно ни јас немаше да ја разберам ако гледав од страна, но ова е лична одлука, многу внимателно промислена и пред сè длабоко проживеана. Ми беше чест да ја претставувам мојата земја и да бидам дел од историјата.“

Годишната плата на Љоренте од околу 4,5 милиони евра не претставува никаков проблем за Баерн Минхен, кој бара дополнителна физичка моќ и универзалност во офанзивата за напад на титулата во Лигата на шампионите. Доколку Атлетико не успее да договори нов потпис до јануари, Баварците ќе имаат право директно да преговараат и да го доведат Шпанецот како слободен играч за следната сезона.