Голема криза ја тресе фудбалската репрезентација на Косово, откако седум репрезентативци одлучија да не играат за националниот тим додека Агим Адеми ја извршува функцијата претседател на Фудбалската федерација на Косово. Капитенот Амир Рахмани беше првиот кој јавно го потврди својот став, порачувајќи дека нема да го облече дресот на Косово сè додека Адеми е на чело на федерацијата. Набргу потоа, кон бојкотот се приклучија и Едон Жегрова, Флорент Муслија, Аријанет Муриќ, Милот Рашица и Ведат Муриќи. Идентитетот на седмиот фудбалер сè уште не е објавен, но се наведува дека и тој е важен член на националниот тим.

Причината за незадоволството е конфликтот меѓу репрезентативците и раководството на федерацијата. Фудбалерите имаат јасно барање – Адеми да се повлече од претседателската функција. Засега нема сигнали дека Адеми размислува за оставка, па неизвесноста околу иднината на репрезентацијата продолжува. Селекторот Франко Фода се најде во незгодна ситуација, бидејќи остана без дел од најважните играчи, а дополнителен проблем претставува и нарушената атмосфера во тимот.

Косово има важни натпревари пред себе, но наместо фокусот да биде на теренот, вниманието е насочено кон сериозниот спор меѓу фудбалерите и федерацијата. Доколку Адеми остане на функцијата, останува отворено прашањето дали бојкотот ќе продолжи и дали кризата ќе добие уште поголеми размери.