Рома испрати сериозно предупредување до конкуренцијата уште на самиот почеток од новата сезона во Серија А. „Волчицата“ по само две одиграни кола има максимален ефект, но уште повпечатливо е што во двата натпревари постигна по четири гола. Тимот од Рим очигледно влезе во сезоната со јасна идеја и огромна самодоверба во нападот. По убедливиот старт, избраниците на Џанпјеро Гасперини продолжија во ист стил и на гостувањето кај Лече, каде што без поголеми проблеми славеа со 0-4.

Главната фигура повторно беше Донел Мален. Холанѓанецот, кој во првото коло блесна со хет-трик, и овојпат одигра клучна улога во офанзивата на Рома. Мален уште во четвртата минута го најави она што следуваше, погодувајќи за рано водство од 0-1. Рома продолжи да напаѓа и во средината на првиот дел практично го реши прашањето околу победникот. Во 23. минута Мален повторно се најде на вистинското место и со својот втор гол зголеми на 0-2. Само неколку минути подоцна следуваше нов удар за домаќинот, откако Матиас Суле се запиша во листата на стрелци за убедливи 0-3.

Со високата предност во раце, Рома во продолжението не мораше да ризикува. Гостите го контролираа темпото, го чуваа резултатот и не дозволуваа Лече да се врати во натпреварот. Сепак, до крајот имаше простор и за уште еден погодок. Родриго Мора во 65. минута го постигна својот првенец во дресот на Рома и ги постави конечните 0-4. Така, Рома по две кола има максимални шест бода и фантастична гол-разлика од 8-0. Со ист број бодови се и Интер, Милан, Јувентус и Лацио, но римскиот тим моментално има најдобра гол-разлика.