Мастерсот во Синсинати продолжува во знакот на големи изненадувања. Откако минатата недела во Монтреал завршницата донесе неочекуван состав, слично сценарио се повторува и на американскиот Мастерс, кој остана без двајцата највисокорангирани тенисери. Првиот носител Александер Зверев беше на чекор до пласман во четвртфиналето, но не успеа да ја искористи меч-топката против Томас Пол. Американецот направи голем пресврт и по повеќе од два и пол часа игра славеше со 4:6, 7:6 (8:6), 6:4.

Пол, кој моментално е 24. тенисер на АТП-листата, во клучните моменти успеа да го сврти мечот во своја корист. По натпреварот призна дека и самиот не е сигурен како успеал да дојде до победата, но ги истакна своите добри ритерни и проблемите на Зверев со првиот сервис. Ниту вториот носител Феликс Оже-Алиасим не успеа да стигне до четвртфиналето. Него го елиминираше сонародникот Френсис Тијафо со убедливи 6:3, 6:4, со што дополнително се отвори патот кон титулата за останатите тенисери.

Во таквата ситуација, Тејлор Фриц се наметнува како еден од главните фаворити за трофејот. Деветтиот тенисер во светот продолжува со одличните настапи на домашен терен, откако претходно го освои турнирот во Вашингтон. Фриц во осминафиналето без поголеми проблеми го совлада Крис О’Конел со 6:4, 6:4 и обезбеди место меѓу најдобрите осум во Синсинати. Со елиминацијата на Зверев и Оже-Алиасим, турнирот сега е целосно отворен, а во завршницата нема ниту еден тенисер кој досега освоил грен-слем титула.