Златан Ибрахимовиќ повторно го привлече вниманието со остри зборови упатени кон Кристијано Роналдо. Поранешниот шведски репрезентативец го коментираше однесувањето на Португалецот кон националниот тим, притоа испраќајќи му порака дека во одреден момент секој голем фудбалер мора да прифати дека кариерата влегува во поинаква фаза.

Ибрахимовиќ смета дека личното его не треба да биде над интересот на репрезентацијата, особено кога станува збор за фудбалер со огромно наследство зад себе.

„Не смееш да дозволиш егото да го уништи наследството што си го изградил. Да го напуштиш кампот на Португалија без да разговараш со соиграчите? Тоа е непочитување“, изјави Ибрахимовиќ во интервју за TUDN.

Швеѓанецот во својата изјава направи паралела со сопственото искуство и начинот на кој тој го заврши својот професионален пат. Според него, големите имиња мора да знаат кога е време да прифатат нова реалност.

„Мора да сфатиш дека повеќе не си млад. Погледни го Златан. И јас некогаш бев млад. Играв на највисоко ниво, а потоа дојде моментот да ставам крај. Дури и лавовите знаат кога ловот е завршен“, порача Ибрахимовиќ.

Односот меѓу двајцата големи фудбалски имиња со години е проследен со остри изјави и меѓусебни провокации. Ибрахимовиќ и во минатото го критикуваше Роналдо, а за време на Светското првенство тврдеше дека Португалецот ја држи репрезентацијата како „заложник“ на своето его. Со најновата изјава, Ибрахимовиќ повторно го отвори прашањето за моментот кога една фудбалска легенда треба да препознае дека нејзината улога повеќе не е иста како во најдобрите години од кариерата.