Вечерва се одигра последното коло од регуларниот дел од сезноната во НБА лигата. Се одиграа 15 натпревари, некои од тимовите кои веќе го имаа решено својот статус и позиција, ги одмараа своите клучни играчи, а сега се познати позициите на сите екипи и кој ќе игра во Плеј-оф и кој тим преку Плеј-ин турнирот ќе се бори за преостанатите места во следната фаза.
Во борбата за шампионскиот прстен остануваат 20 екипи. Првите шест екипи од Западната и Источната конференција обезбедија директен пласман во Плеј-оф фазата, додека екипите кои завршија од 7-та до 10-та позиција во Плеј-ин турнир ќе решаваат за преостанатите позиции. Седмиот и осмиот играат меѓусебен дуел, а победникот ќе ја заземе седмата позиција. Оној кој ќе загуби потоа ќе игра со победникот од дуелот помеѓу деветиот и десетиот, за осмата последна позиција која води во Плеј-оф фазата.
На западот директен пласман обезбедија Оклахома Сити, Сан Антонио, Денвер, Лејкерс, Хјустон и Минесота, додека на истокот директно во Плеј-оф одат Детроит, Бостон, Њу Јорк, Кливленд, Торонто и Атланта.
На Плеј-ин турнирот на запад ќе настапат Феникс, Портланд, Клиперс и Голден Стејт, а на истокот Филаделфија, Орландо, Шарлот и Мајами.
Феникс и Портланд ќе играат за седмата позиција, а поразениот од тој дуел ќе го чека победникот од Клиперс и Голден Стејт во борбата за осмата позиција. На истокот, Филаделфија и Орландо ќе се борат за седмата позиција, а поразениот ќе се сретне со подобриот од дуелот меѓу Шарлот и Мајами за осмата позиција.
Западна конференција
(1) Оклахома Сити Тандер – (8) победник од плеј-ин
(2) Сан Антонио Спарс – (7) победник од плеј-ин
(3) Денвер Нагетс – (6) Минесота Тимбервулвс
(4) Лос Анџелес Лејкерс – (5) Хјустон Рокетс
Источна конференција
(1) Детроит Пистонс – (8) победник од плеј-ин
(2) Бостон Селтикс – (7) победник од плеј-ин
(3) Њујорк Никс – (6) Атланта Хокс
(4) Кливленд Кавалирс – (5) Торонто Репторс
