Колумбискиот фудбалер Хамес Родригез повеќе не е член на Минесота Јунајтед, откако американскиот клуб официјално потврди дека двете страни ја завршиле соработката. Поранешниот играч на Реал Мадрид и Баерн Минхен пристигна во Минесота на почетокот на оваа година, но не успеа да остави поголем белег во МЛС. Во дресот на клубот одигра само шест првенствени натпревари и запиша две асистенции.

Во изминатиот период сè погласни беа шпекулациите дека Родригез би можел да стави крај на богатата кариера по завршувањето на Светското првенство во 2026 година, но засега нема официјална потврда за таква одлука. Хамес во текот на кариерата настапуваше за бројни европски и јужноамерикански клубови, меѓу кои Порто, Монако, Евертон, Олимпијакос, Рајо Ваљекано, Сао Паоло и Леон, а најголема трага остави во Реал Мадрид, каде што се етаблира како еден од најдобрите офанзивни играчи на својата генерација.