Со натпреварите од првото коло официјално започнува 64-та сезона во германската Бундеслига, во која 18 екипи низ 34 кола ќе се борат за шампионскиот пехар сè до 22 мај. Апсолутен фаворит за одбрана на титулата е Баерн Минхен, кој веќе го освои трофејот во Суперкупот „Франц Бекенбауер“ по победата од 2-1 над Борусија Дортмунд. Избраниците на Винсент Компани влегуваат по доминантната измината сезона во која постигнаа рекордни 122 гола и го освоија првенството со 16 бода предност, надополнето со трофејот во ДФБ Купот. Главен адут во нападот на Баварците останува капитенот на Англија, Хари Кејн, кој изминатата сезона беше најдобар стрелец со 36 погодоци.

Бајерн го засили офанзивниот дел со ангажманот на Исмаел Саибари од ПСВ поради здравствените проблеми на Џамал Мусијала и повредите на Серж Гнабри и Ленарт Карл. Од друга страна, вицепрвакот Борусија Дортмунд направи значајни инвестиции во средниот ред, ги ангажираше младите грчки таленти Константинос Карецaс од Генк за 30 милиони евра и Јанис Константелијас од ПАОК за 26 милиони евра, како и дефанзивниот играч за врска Џои Ферман од ПСВ за 22 милиони евра. Дортмунд се обиде да го доведе и креативецот Саид Ел Мала од Келн, но цената од 50 милиони евра се покажа како превисока.

Големи ротации претрпе и РБ Лајпциг, кој заврши на третото место изминатата сезона. Клубот го продаде крилниот напаѓач Јан Диоманде во Реал Мадрид за дури 140 милиони евра, го смени тренерот Оле Вернер и на негово место го постави Мартин Демикелис. Директна промоција во елитата обезбедија Шалке, дебитантот Елверсберг и Падерборн, додека во понизок ранг испаднаа Хајденхајм, Сент Паули и Волфсбург.