Легендарниот ракометен тренер Веселин Вујовиќ повторно привлече внимание со своите изјави, овојпат зборувајќи за настапот на Партизан во Лигата на шампионите. Иако им посака успех на „црно-белите“, смета дека добивањето специјална покана не е само спортско прашање.

Во интервју за подкастот „Капитен“, актуелниот селектор на Катар призна дека бил изненаден од одлуката Партизан да добие место во елитното европско натпреварување.

„Мислам дека тоа е тесно поврзано со политиката. Ако дојде до политички промени во нашата земја, постои опасност целиот проект да пропадне. Тоа не е добро“, изјави Вујовиќ.

Сепак, тој нагласи дека искрено сака Партизан да има успешна сезона, бидејќи тоа, според него, ќе биде од корист за целиот српски ракомет.

„Од срце му посакувам добри резултати на Партизан. Ќе биде одлично за клубовите и за репрезентацијата ако во Белград доаѓаат екипи како ПСЖ и Кил. Само се надевам дека овој проект ќе има долгорочна стабилност“, порача Вујовиќ.

Освен за Партизан, славниот стратег се осврна и на репрезентацијата на Србија, потенцирајќи дека пласманот на големо натпреварување е само првиот чекор и дека вистинската цел секогаш мора да биде борбата за медали, а не само учество.