Шкендија го претрпе вториот пораз за време на летните подготовки во Словенија, откако во третата контролна средба загуби со минимални 1-0 од словенечкиот тим Целје. По израмнето прво полувреме без погодоци, двете екипи продолжија со борбена игра и во вториот дел. Клучниот момент се случи во 80. минута, кога Суховршник ја искористи својата шанса и го постигна единствениот гол на натпреварот, со кој му донесе триумф на својот состав.

Ова е втор неуспех за тетовскиот тим во подготвителниот период, по претходниот пораз од Хајдук Сплит (4-0). Засега единствената победа на „црвено-црните“ останува онаа против Копер, кога славеа со 2-1 на првиот тест. До почетокот на новата сезона, Шкендија ќе продолжи со работа на тактичкото воигрување и подигнување на формата, со цел што поподготвено да ги дочека домашните и европските предизвици.