Неколку дена по елиминацијата на Бразил од Норвешка во осминафиналето на Светското првенство, Винисиус Жуниор се огласи со емотивна порака до навивачите, признавајќи дека разочарувањето од неуспехот сè уште е огромно. Ѕвездата на Реал Мадрид, која на турнирот постигна три гола и запиша две асистенции, истакна дека му биле потребни неколку дена за да ги среди мислите пред да им се обрати на бразилските фанови.

„Да го носам дресот на Бразил е најголемата гордост во мојот живот. Имавме тим кој можеше да стигне многу подалеку, но не успеавме. Чувството на вина и разочарување е огромно. Барам прошка од сите навивачи и ветувам дека ќе продолжам да се борам за повторно да го вратиме Бразил на светскиот врв“, порача Винисиус.

Во осминафиналниот натпревар против Норвешка, Бразил промаши пенал при резултат 0:0, а Винисиус објасни дека не ја презел одговорноста бидејќи стручниот штаб претходно го одредил Бруно Гимараеш за изведувач.