Фудбалерите на Вардар доживеаја непријатно изненадување во осминафиналето од Купот на Македонија, откако на домашен терен загубија од Тиквеш со 1-3 и ги завршија настапите во најмасовното домашно клупско натпреварување. Кавадарчани одиграа одлично второ полувреме, во кое постигнаа три гола и го обезбедија пласманот меѓу осумте најдобри. Еден од најатрактивните моменти на натпреварот се случи во 61. минута, кога Сила со ефектен погодок донесе водство од 1-2 за гостите. Тиквеш потоа успеа да ја потврди победата и да приреди големо изненадување, елиминирајќи го еден од најтрофејните македонски клубови.

Пласман во четвртфиналето обезбеди и Струга ТЛ, која со сигурни 2-0 ја совлада Беласица. Скопје минимално славеше против Новаци со 1-0, додека Работнички во возбудлив натпревар беше подобар од Каменица Саса со 3-2. Најголема неизвесност имаше во Ѓорче Петров, каде што Македонија ЃП и Брегалница одиграа 2-2 во регуларниот дел. Победникот беше решен по изведувањето пенали, а домашниот тим беше попрецизен и славеше со 5-4, со што штипјани останаа без место во следната фаза. Четвртфинале избори и Шкендија од Арачиново, која на гостувањето кај Башкими во Куманово триумфираше со 2-0.

Преостануваат уште дуелите меѓу Пелистер и Силекс, кој се игра во Битола, како и средбата АП Брера – Арсими, закажана за 25 ноември. По нивното комплетирање ќе бидат познати сите четвртфиналисти во Купот на Македонија.