Ракометарите на Вардар со реми 26-26 против германскиот Мелсунген го завршија настапот во овогодинешната Лига на шампиони. „Црвено-црните“ одиграа неизвесен натпревар во кој имаа свои моменти, но на крајот не успеаја да стигнат до победа. Гостите подобро го отворија дуелот и поведоа со 0-2, а во продолжението стигнаа и до предност од три гола. Вардар постепено ја подобруваше играта, се врати резултатски и во финишот на првото полувреме го презеде водството. На пауза домашниот тим замина со предност од 14-12.

Мелсунген одлично го започна вториот дел и со серија од 4-1 направи пресврт за водство од 15-16. До самиот крај се водеше изедначена битка, а ниту една екипа не успеа да се одлепи на посериозна разлика. Во драматичната завршница Вардар имаше можност да стигне до триумф, но гостите успеаја да одговорат и да го постават конечниот резултат 26-26.

Матео Фадуил со седум погодоци беше најефикасен кај Вардар, додека Леон Штел постигна осум гола за германскиот состав. Со ова реми, двократниот европски шампион ја заврши својата европска сезона.