Домашното првенство влегува во самата завршница, а денеска стартува 31. коло.
Лидерот Вардар до 74 бодови на своето конто попладнево на Арената го пречекува Силекс и во рацете ја има првата меч топка за освојување на шампионската титула.
Доколку „црвено – црните“ победат, а второпласираната Шкендија на домашен не слави во дуелот против Струга Трим Лум во натпревар што се игра во истиот термин од 16:00 часот тогаш Вардар ќе го подигне пехарот и ќе стане нов првак на Македонија.
Дури и да не победи, Вардар, односно да одигра нерешено, а Струга ТЛ ја победи Шкендија, и во тој случај Вардар е најдобриот сезонава.
Сепак, „математиките“ не се во главите на избраниците на Гоце Седлоски, напротив. Се е во насока на одигрување на уште еден добар меч во серија и освојување на трите бода. Па дали истите ќе значат и титула баш овој викенд, или продолжување на истата до следниот меч, тоа е сосема друг момент.
Вардар има четири победи по ред во домашниот шампионат, а шест кола нема пораз. Бодовната разлика со Шкендија е шест бодови, што секако дава огромна предност во битката за титулата, но таа воопшто не е готова. Денешен кикс и не освојување на трите бода ќе значи дополнителен притисок, во последните две етапи од шампионатот, каде што Вардар најпрво оди на гостување кај Струга ТЛ ма 17 мај, а потоа, во последното коло го пречекува сеуште актуелниот шампион, Шкендија на Арената на 23 мај.
Како што наближува крајот на сезоната во ПМФЛ, комбинаториките во борбата за подобри позиции стануваат погласни, при што секоја страна јасно знае кон што цели. ФК Пелистер како прволигашки клуб со голема традиција е повеќе од локален бренд, но оваа година имаше слаб старт на сезоната и сѐ уште го нема потврдено опстанокот во елитното друштво за следната година.
Оттука, целта на битолските „зелено-бели“ е јасна и недвосмислена, а резултатите во пролетниот дел на сезоната говорат дека нивната кампања е поуспешна отколку во есенскиот дел. Откако успеа да се врати непоразен од дуелите со директните конкуренти Работнички, а претходно да избори позитивни резултати со Вардар, Шкендија и Силекс, сега Пелистер го пречекува Шкупи на домашен терен.
Натпреварот во Битола ќе се игра на модернизираниот стадион „Петар Милошевски“ со почеток во 16 часот. Во истиот термин ќе стартуваат уште два натпревари: Шкендија – Струга и Вардар – Силекс.
