Вардар им се врати на победите во домашното првенство, но триумфот над Арсими од 2-0 на теренот на ФФМ остана во сенка на протестот на најверните навивачи. „Комитите“ уште од трибините упатија скандирања и пораки насочени кон раководството на клубот, а во второто полувреме го прекинаа натпреварот со спуштање близу теренот. По повеќе од 15 минути прекин, навивачите го напуштија својот сектор и продолжија со протестот надвор од стадионот, додека фудбалерите на Вардар го довршија натпреварот до важна победа. Воедно, средбата ќе остане запаметена и како победничко деби на Миодраг „Гроф“ Божовиќ на клупата на македонскиот шампион.

Вардарци од самиот почеток заиграа офанзивно и ја презедоа контролата врз случувањата на теренот. Домаќинот постепено го засилуваше притисокот, а таквата игра резултираше со водство во 25. минута. По одлично изведена тимска акција, Маневски успеа да ја протне топката низ нозете на Алими и да создаде простор за завршница, а Закариќ беше на вистинското место и од непосредна близина ја затресе мрежата за 1-0.

Арсими се обиде да одговори, а неколку минути подоцна Спахиу упати силен удар кон голот на Вардар. Сепак, Силјановски беше внимателен и со одлична интервенција спречи израмнување. До паузата немаше промена на резултатот, па Вардар на одмор замина со минимална предност. Почетокот на вториот дел донесе најдобра можност за гостите во тој период, но Талески одлично реагираше и не дозволи Арсими да се врати во натпреварот.

По продолжувањето на играта, Вардар повторно ја презеде целосната контрола и мирно го приведе натпреварот кон крајот. „Црвено-црните“ не му дозволија на противникот да создаде посериозна прилика пред голот на Талески, а во финишот ставија точка на натпреварот.

Во 102. минута Омерагиќ и Данев одлично ја изиграа одбраната на Арсими, по што младиот офанзивец излезе во добра позиција и со сигурна реализација го удвои водството на Вардар. На крајот, Вардар заслужено стигна до 2-0 и важни три бода, со што Божовиќ победнички го започна својот мандат на клупата на шампионот. Победата носи позитивен резултат за новиот тренер, но случувањата надвор од теренот повторно покажаа дека атмосферата околу клубот е далеку од мирна.