Валенсија продолжува да се мачи на стартот од новата сезона во Ла Лига. Тимот за кој настапува македонскиот репрезентативен голман Столе Димитриевски повторно остана без бодови, откако на домашен терен загуби од Реал Сосиедад во драматичен натпревар со пет погодоци. По седум одиграни кола, Валенсија веќе има пет порази, што јасно го покажува тешкиот почеток на сезоната за екипата од „Местаља“. Дополнителен удар е фактот што овојпат тимот прими гол во самиот финиш и остана без бод и покрај тоа што успеа да се врати во натпреварот.

Реал Сосиедад поведе во 26. минута преку Сучиќ, а Валенсија во продолжението успеа да одговори и да го израмни резултатот. Мајол погоди во 57. минута за 1:1, по што следуваше ново водство на гостите.

Солер беше прецизен од белата точка во 76. минута и му донесе предност на Реал Сосиедад, но домашниот состав не се предаде. Во 84. минута Беитиа ја затресе сопствената мрежа и со автогол ѝ овозможи на Валенсија да стигне до 2:2.

Сепак, кога се очекуваше натпреварот да заврши без победник, Реал Сосиедад зададе удар во судиското продолжение. Баренечеа во 91. минута го постигна решавачкиот погодок и му донесе голема победа на својот тим.

Со новиот неуспех, Валенсија останува на претпоследната, 19. позиција на табелата со само четири освоени бодови. Реал Сосиедад, пак, со седум бодови се искачи на 15. место.