Дресот што Мајкл Џордан го носеше во финалната серија на НБА-лигата во 1998 година достигна неверојатна цена на аукција. Црвениот дрес со бројот 23, во кој легендарниот кошаркар настапи на вториот натпревар од финалето против Јута Џез, беше продаден за 14 милиони долари, со што постави рекорд за најскапо платен кошаркарски предмет од спортските колекции.

Аукциската куќа „Хант Оукшнс“ соопшти дека дресот завршил во рацете на Рон Фирман, инвеститор во недвижности од Мајами. Станува збор за потпишан дрес што Џордан го носеше на 5 јуни 1998 година во Солт Лејк Сити, кога Чикаго Булс славеа против Јута со 93-88 и израмнија на 1-1 во финалната серија.

Чикаго на крајот ја доби серијата со 4-2 и ја освои титулата, шеста за клубот во ерата на Џордан. За легендарниот кошаркар тоа беше и шести, последен шампионски прстен во кариерата, со кој уште еднаш го потврди своето место меѓу најголемите имиња во историјата на спортот.

Сумата од 14 милиони долари е втора највисока досега платена за спортски дрес. Над неа останува само дресот на бејзбол-легендата Бејб Рут, кој во 2024 година беше продаден за 24,12 милиони долари. Рут го носел во 1932 година, во историскиот натпревар од Светската серија против Чикаго Кабс, кога го постигнал еден од најпознатите хоум-рани во историјата на бејзболот.

Интересот за дресовите на Џордан од финалето во 1998 година е огромен. Ова е веќе трет дрес од таа серија што достигнува цена повисока од 10 милиони долари. Дресот од првиот натпревар беше продаден за околу 10,1 милион долари во 2022 година, додека примерокот од третиот меч неодамна достигна цена од 12,26 милиони долари.

Овие аукциски резултати уште еднаш покажуваат дека предметите поврзани со најголемите спортски легенди имаат огромна вредност меѓу колекционерите, особено кога се поврзани со историски моменти. За Џордан, чија кариера остави длабока трага во НБА-лигата, дресовите од последната шампионска сезона продолжуваат да бидат меѓу најбараните спортски сувенири во светот.