Удинезе обезбеди пласман во следната рунда од Купот на Италија, откако на домашен терен со 2:1 ја совлада Венеција во натпреварот од шеснаесетфиналето. Гостите подобро го започнаа мечот и успеаја да поведат уште во деветтата минута. Ричи Саградо беше најснаодлив по една одбиена топка во казнениот простор и со удар од непосредна близина го совлада домашниот голман.

Удинезе постепено го презеде поседот и почна да создава шанси пред противничкиот гол. Во 31. минута Ленон Милер се обиде со удар од далечина, но Лоренцо Монтипо одлично интервенираше и спречи израмнување. Само три минути подоцна, сепак, немаше спас за голманот на Венеција. Мергим Војвода испрати одлична топка од левата страна, а Вакун Бајо со удар со глава ја затресе мрежата за 1:1. Котдивоарскиот напаѓач целосниот пресврт го комплетираше во 53. минута. Бајо повторно беше на вистинското место во шеснаесетникот, го прими додавањето од Кинан Дејвис и со силен удар постигна уште еден гол за водство на Удинезе од 2:1.

Домашниот состав во продолжението имаше можности да стави точка на натпреварот, но Монтипо со неколку добри интервенции ја одржуваше Венеција во игра. Голманот ги одбрани ударите на Унаи Гомес и Дејвис, но неговиот тим сепак не успеа да стигне до израмнување. Така, Удинезе со пресврт ја продолжи својата приказна во Купот на Италија, а во следната рунда го очекува сериозен предизвик. На домашен терен ќе го пречека Аталанта во борбата за место во четвртфиналето.