Актуелниот светски шампион Аргентина се соочува со сериозен хендикеп непосредно пред почетокот на Светското првенство. Селекторот Лионел Скалони доби исклучително лоши вести од тренинг кампот откако дефанзивецот Леонардо Балерди заработи потешка повреда на ногата. Ова значи дека сигурниот одбранбен фудбалер дефинитивно отпаѓа од комбинација за претстојниот голем турнир.

Балерди настрадал на вчерашниот тренинг на репрезентацијата, а првичните лекарски прегледи потврдија дека пред него е принудна пауза од најмалку еден месец. Поради долготрајната рехабилитација, тој нема да може да им помогне на своите колеги во мисијата наречена одбрана на светскиот трон. Ова е огромен удар за целата нација бидејќи повредата доаѓа во најлошиот можен момент, на само неколку дена пред официјалниот старт.

Стручниот штаб на „гаучосите“ сега ќе мора експресно да повика замена и да ги менува тактичките замисли во дефанзивната линија. Аргентина се наоѓа во групата со Алжир, Австрија и Јордан. Првиот голем предизвик за светските прваци е закажан за 16 јуни против селекцијата на Алжир. Потоа, на 22 јуни следува пресметката против незгодната Австрија, а шест дена подоцна групната фаза ја заокружуваат со дуелот против Јордан.