Ескалацијата на воениот конфликт на Блискиот Исток создава сериозна неизвесност во светскиот спорт. Под знак прашалник се дел од големите настани до крајот на 2026 година, меѓу кои и трките во Формула 1 и Мото ГП во Катар и Абу Даби. Прва на удар е Големата награда на Катар во Мото ГП, планирана за 8 ноември. Трката на патеката „Лусаил“ може да има значајна улога во борбата за титулата, но евентуалното откажување би донело промени во завршницата на шампионатот.

Неизвесност постои и во Формула 1, каде што Катар треба да биде домаќин на трката на 29 ноември, а сезоната да заврши во Абу Даби на 6 декември. Како можна алтернатива се споменува Имола, но евентуалната промена би донела сериозни логистички и финансиски предизвици. Загриженост изразија и водечките возачи. Марк Маркез порача дека животот е поважен од трките, додека Макс Ферстапен истакна дека не треба да се вози во регион зафатен од војна.

Последиците би можеле да ги почувствуваат и други спортови. Се разгледуваат алтернативни сценарија за релито Дакар, а тенискиот турнир „Шест кралеви“ во Саудиска Арабија е поместен за крајот на декември. Конечните одлуки ќе зависат од развојот на безбедносната ситуација, а наредните недели би можеле да бидат клучни за судбината на спортските настани планирани до крајот на годината.