Еурофарм Пелистер имаше европска вечер за заборав, откако на домашен терен не успеа да го покаже препознатливото лице. Битолчани уште од самиот почеток влегоа во проблеми, а слабата реализација и бројните грешки го ставија натпреварот на страна на гостите. Ла Риоха знаеше како да ја искористи секоја понудена шанса и постепено ја презеде целосната контрола. До крајот Пелистер не успеа сериозно да го загрози убедливото водство на шпанскиот состав.

Гостите славеа со 31:24 во првото коло од ЕХФ Лигата на Европа, а клучната разлика ја направија уште во првиот дел. Пелистер долго време се мачеше да стигне до гол. Првиот погодок го постигна дури во шестата минута, а по петнаесетина минути игра Ла Риоха веќе имаше предност од 10:3.

Битолчани правеа премногу грешки во нападот, а шпанскиот тим тоа го казнуваше со брзи контри и полуконтри. Дополнителен проблем беше голманот Ледо, кој во првото полувреме запиша 11 одбрани. На паузата Пелистер имаше негатива од 8:16.Ниту вториот дел не донесе пресврт. Ла Риоха без поголеми проблеми го одржуваше водството, а во 45. минута по погодокот на Мартинез стигна и до највисоки плус десет – 27:17.

До крајот гостите рутински го приведоа натпреварот до крај и заслужено ги освоија бодовите со победа од 31:24. Самоил Ристевски со четири гола беше најефикасен кај Пелистер, додека Мартинез постигна шест за Ла Риоха. Сепак, првото име на натпреварот беше голманот Ледо, кој заврши со 21 одбрана и три постигнати гола.

За Пелистер следува брз обид за поправен впечаток. На 6 октомври битолчани ќе гостуваат кај Гдањск, кој во првото коло со 38:34 го совлада Гумерсбах.