Денес се одигра 2. коло во машката кошаркарска МТЕЛ Супер Лига. Во групата на победниците, бевме сведоци на трилер натпревар во дербито помеѓу ТФТ и МЗТ Скопје. Во битката за првата позиција, екипата на ТФТ со неверојатен пресврт во четвртата четвртина славеше победа над МЗТ Скопје со 93:91. Херој на домашната екипа беше Ташовски со тројка во последните моменти од натпреварот. Двете екипи се менуваа во водството, а домашната екипа замина со предност на полувремето (43:41) од два поени. Во третата четвртина, актуелниот шампион МЗТ Скопје, заигра подобро и дојде до високи 14 поени предност. Но во последната четвртина, избраниците на Боро Смилковкси изиграа фуриозно, покажувајќи го својот карактер уште еднаш годинава и со неверојатен пресврт, со тројката на Ташовски во последните моменти дојдоа до победата и останаа на првата позиција на табелата.
Кај домаќинот, Ташовски беше најпрецизен со 27 поени, а кај гостите од Аеродором, Мекјуен и Војдан Стојановски постигнаа по 18 поени.
Кошаркарите на Пелистер славеа победа на гости кај Кожув со 95:85 и им се реваншираа на гевгеличани за поразот во регуларниот дел од сезоната. Кај победниците од Битола најпрецизен беше Никола Малешевиќ со 21 поен, а кај Кожув Брајан Боувен постигна 22 поени.
Во последниот натпревар во групата на победници, Маџари во финишот дојде до победа на гостувањето кај Тиквеш со 100:97. Џејвон Грин со 27 поени беше најпрецизен во редовите на Маџари, додека Квинтон Минси постигна 22 поени за Тиквеш.
Во Плеј-аут групата, екипата на Гостивар, по продолжението беше подобара од Работнички, славејќи со 75:70. Црниќ и Димитриевски постигнаа по 17 поени кај Гостивар, додека кај Работнички Рикиќ имаше 19 поени, а Костовски 18 поени.
КК Ангели, во дуелот на последнопласираните, славеше победа против Феникс 2010. Стефанов кај победничкиот тим постигна 21 поен, а Рахма беше најдобар кај Феникс 2010 со 16 поени.
Куманово дојде до победа над Чарир 2030, во последниот натпревар од оваа група, со 91:83. Кај гостите од Куманово најпрецизен беше Ѓуроски со 27 поени, а Билингслеј кај домашната екипа постигна 26 поени.
