Неделната програма од првото коло во германската Бундеслига донесе два драматични натпревари исполнети со убедливи триумфи, рекорди и враќања на големата сцена.

Фрајбург на погон на јапонската машина Јуито Сузуки отвори силно и го прегази Вердер Бремен со убедливи 4-1. 25-годишниот јапонски напаѓач, кој во целата мината сезона постигна четири гола, сега уште во првиот меч го запиша првиот хет-трик во новата сезона од Бундеслигата. Во листата на стрелци за домашниот состав се впиша и минатогодишниот прв стрелец Игор Матановиќ, за комплетирање на фуриозниот почеток на Фрајбург.

Во вториот натпревар, враќањето на Шалке во германската елита се претвори во вистински кошмар, откако гигантот од Гелзенкирхен претрпе тежок пораз на гостувањето кај Аугзбург со 3-0. Повратникот беше во целосно подредена положба, а работите дополнително се влошија по црвениот картон на Шаленберг. Аугзбург го отвори резултатот преку Грегорич уште во 18. минута, додека во самиот финиш со играч повеќе ја запечати победата со погодоците на Антон и Рибеиро. За посебна емоција за љубителите на фудбалот се погрижи Един Џеко, кој влезе во второто полувреме за Шалке на местото на Никола Катиќ и го забележа својот прв настап во Бундеслигата по повеќе од 15 години пауза.