Чешкиот фудбал се соочува со сериозен корупциски скандал, откако дисциплинската комисија на Фудбалската федерација на Чешка му изрече 15-годишна суспензија на поранешниот судија Симон Вејтаса. Покрај долгогодишната забрана за вршење судиска функција, 33-годишникот е казнет и со 150.000 чешки круни поради наводно примање мито со цел влијание врз фудбалски натпревари.

Според одлуката на дисциплинските органи, случајот е поврзан со три натпревари на резервниот тим на Баник Острава, одиграни во третата чешка лига во периодот од 2021 до 2023 година. Комисијата утврдила дека во два од овие случаи судијата примил мито за да влијае врз исходот на натпреварите.

Првиот спорен дуел бил одигран на 17 октомври 2021 година, кога Баник Острава Б загубил од Знојмо со 2-4. Вториот случај се однесува на натпреварот против Фридек-Мистек, одигран на 2 октомври 2022 година, кој завршил со победа на резервниот тим на Баник од 3-1. Во истрагата бил опфатен и натпреварот против Старт Брно од септември 2023 година, на кој Баник славел со 2-1.
Вејтаса ги отфрла обвинувањата и најавил дека ќе поднесе жалба на изречената казна. Тоа значи дека случајот би можел да добие и дополнителен правен епилог, додека надлежните продолжуваат со постапките за утврдување на сите околности.

Овој случај е дел од поширока истрага за корупција во чешкиот фудбал, која започнала во март 2026 година. Под лупа се десетици натпревари од различни натпреварувачки категории, вклучувајќи и младински натпреварувања. Покрај дисциплинските постапки што ги води фудбалската федерација, случајот го истражува и полицијата, која ги проверува сомнежите за местење натпревари. Новите сознанија би можеле да откријат дополнителни неправилности и да доведат до санкции за други лица вклучени во скандалот.