Вистинската сапуница и правна војна меѓу Килијан Мбапе и неговиот поранешен клуб Пари Сен Жермен конечно доби официјален судски расплет. Француското правосудство ја затвори постапката што беше покрената по пријавата на напаѓачот, заклучувајќи дека нема доволно правен основ ниту докази за подигање какво било обвинение.

Како што пренесува новинската агенција АФП, истражните судии во Париз ја донеле одлуката откако правниот тим на францускиот репрезентативец реши да ја повлече тужбата за наводно психичко вознемирување и обид за уцена за време на преговорите околу договорот. Повлекувањето на тужбата го оневозможи понатамошниот тек на процесот, правејќи ги сите истражни дејствија бесмислени.

Во официјалното образложение на судските органи се наведува дека понатамошното водење на случајот станало неодржливо:

„Би било потполно бесмислено да се сослушуваат сведоци и засегнати страни доколку самиот подносител на пријавата повеќе не инсистира на своите тврдења и официјално ја повлекол постапката. Доколку истрагата продолжеше, сите опфатени лица едноставно ќе се повикаа на тоа повлекување за да избегнат одговори.“

Овој правен спор беше само еден сегмент од нарушените односи меѓу Мбапе и раководството на ПСЖ, кои кулминираа со неговото заминување без обештетување во Реал Мадрид. Иако затворањето на овој случај ги ослободува „светците“ од кривична одговорност, тоа не ја менува фактичката состојба дека разделбата меѓу двете страни останува една од најтурбулентните во современиот фудбал.