Додека соседните земји кројат планови за мега-проекти и спасување на квалитетот на својот најтрофеен спорт, ватерполото во Македонија веќе одамна ја изгуби битката со времето и негрижата. Кај нас овој спорт буквално не постои на мапата, базените се реткост, клубовите се бројат на прсти од една рака, а репрезентативните настапи се само бледо сеќавање на минатото. Додека ватерполото кај нас тивко изумира во сенка на другите спортови, во регионот се подготвува вистински земјотрес кој би можел целосно да ја промени сликата на балканските базени.
Српското ватерполо моментално минува низ драматичен период по оставката на селекторот Стевановиќ и бојкотот на дури 11 репрезентативци, кои одбиваат да играат сè додека Слободан Соро е на чело на сојузот. Во екот на оваа криза, како што пренесува „Спорт клуб“, се појави иницијатива за повторно формирање на силната Регионална лига. Како главни двигатели на оваа идеја се споменуваат поранешните асови Александар Шапиќ и Александар Шоштар, кои веќе оствариле контакт со првиот човек на хрватското ватерполо, Перица Букиќ.
Информациите протекоа преку писмо на Букиќ упатено до хрватските клубови, во кое тој открива дека веќе се водени разговори во Загреб за враќање на заедничкото натпреварување. Планот е амбициозен: новата лига би започнала со десет екипи, по пет најдобри од Србија и Хрватска, со отворена врата за вклучување на црногорските тимови во блиска иднина. Целта е јасна, подигнување на квалитетот на домашното првенство, кое во Хрватска веќе не се смета за доволно предизвикувачки за водечките тимови.
Според предложениот модел, веќе од сезоната 2027/28 лигата би се проширила во две дивизии, со што би се создала вистинска елитна мрежа на Балканот. Сепак, патот до реализација не е без препреки. Иако челниците на сојузите си подадоа рака, дел од хрватските гиганти како сплитски Јадран и дубровнички Југ се претпазливи и сè уште не даваат зелено светло за овој регионален проект. Дали базените во Белград, Загреб и Дубровник повторно ќе го видат најдоброто од светското ватерполо на едно место, останува да покажат преговорите во наредниот период.
