Главниот град на Македонија го доби правото да биде домаќин на 23-тото издание на Медитеранските ракометни игри во машка конкуренција, откако Извршниот комитет на Медитеранската ракометна конфедерација едногласно донесе одлука за доделување на организацијата.

Натпреварите ќе се одиграат во Скопје во периодот од 18 до 25 април 2027 година. На овој меѓународен турнир ќе настапат младински репрезентации составени од ракометари родени во 2010 година и помлади, што претставува важна можност за промоција и развој на новата генерација македонски ракометни таленти.

Покрај машкиот турнир во Скопје, Медитеранската конфедерација ја додели и организацијата за женското издание на натпреварувањето, кое ќе се одржи во Хамамет, Тунис, од 7 до 14 март 2027 година.