Свеченоста за доделувањето на „Златната топка“ за 2026 година во Лондон помина гламурозно, но мала дамка остави контроверзен потег на официјалниот телевизиски канал на Реал Мадрид. Клупската телевизија на „кралевите“ го прекина преносот во живо на гала-церемонијата на само неколку секунди пред Хари Кејн официјално да биде прогласен за победник, пренесуваат шпанските медиуми.

Програмата беше нагло прекината во точниот момент кога стана јасно дека англискиот напаѓач го освојува престижното признание пред првата ѕвезда на мадридскиот гранд, Килијан Мбапе. На екранот се појави само суво соопштение дека содржината е „недостапна поради причини поврзани со аудио-визуелни права за емитување“.

Сепак, симптоматичниот тајминг на овој прекин веднаш предизвика бура од реакции во Шпанија и ги подгреа сомнежите дека зад сè стои револт и протест во редовите на Реал поради фактот што Мбапе не се закити со главниот трофеј.

Хари Кејн ја освои „Златната топка“ по застрашувачка сезона во која постигна дури 73 гола на 65 натпревари (од кои 61 за Бајерн Минхен), додека Мбапе мораше да се задоволи со второто место. Ваквиот потег на клупскиот медиум од Мадрид не е целосен преседан, со оглед на тоа што „Реал ТВ“ и претходно беше мета на критики за објавување контроверзни видеа насочени кон судиите пред важните првенствени мечеви.