Предводникот на Атлетико Мадрид, Дијего Симеоне, покажа голема почит кон Манчестер Јунајтед пред вечерашното дерби во 2. коло од Лигата на шампионите. И покрај тоа што англискиот гигант влегува во овој дуел со лоша серија во Премиер лигата, без победа на четири меча по ред и на скромното 13. место на табелата, аргентинскиот стратег предупредува дека противникот поседува огромен квалитет.

Симеоне истакна дека дефанзивниот притисок и брзината на Јунајтед бараат максимална претпазливост:

„Нè очекува противник кој агресивно притиска без топка на противничката половина, брзо ви се приближува и располага со исклучително брзи играчи. И покрај нивните неодамнешни резултати и голем број ремија, тие и понатаму ја создаваат истата опасност како и минатата сезона. Станува збор за исклучително силен тим“, изјави Симеоне.

Покрај анализата на противникот, аргентинскиот стручњак се осврна и на формата на својата најголема ѕвезда Хулијан Алварез, кој по летните турбуленции околу потенцијалниот заминат трансфер и мачењето со повреди, сѐ уште нема постигнато погодок во новата сезона.

„На напаѓачите со карактеристики какви што има Хулијан секогаш им се потребни голови, и тоа не важи само за него. Но, освен што е одличен во реализацијата, тој е вистински тимски играч кој сјајно се поврзува со соиграчите. Тој има многу повеќе квалитети и оружја во својот арсенал од самото постигнување голови. На минатиот меч против Алавес одигра сјајно второ полувреме и се надевам дека ќе продолжи да напредува за да го достигне нивото на кое сите сакаме да го видиме“, заклучи популарниот Чоло.

Во воведната рунда од елитното натпреварување, Атлетико доживеа пораз од Ливерпул со 2:1, додека Јунајтед го совлада Сабах со убедливи 4:0. Мечот на „Метрополитано“ е закажан за вечерва со почеток од 21:00 часот.