По возбудливите реванш пресметки во полуфиналето, екипите на Силекс и тетовска Шкендија обезбедија пласман во големото финале на Купот на Македонија. Иако се соочија со силен отпор од второлигашките конкуренти, фаворитите на крајот ја оправдаа својата улога и ќе се борат за престижниот пехар.
Екипата на Силекс успеа минимално да го совлада Охрид со 1:0, што по нерешените 1:1 во првиот дуел, беше доволно за пласман во завршницата. Кратовци беа поконкретни на теренот, иако во 25-тата минута пропуштија златна шанса за водство кога Ади Алиќ не реализираше пенал, шутирајќи директно во гостинскиот голман Дамјан Серафимов. Сепак, правдата беше задоволена во 34-тата минута кога беше досуден нов удар од 11 метри, кој овојпат Дарко Додев успешно го претвори во гол за конечен триумф и голема радост во Кратово.
Во второто полуфинале, Шкендија од Тетово славеше на гостувањето кај Шкендија Арачиново со 2:0. Иако прволигашот ја имаше доминацијата во текот на целиот натпревар, отпорот на мотивираните домаќини беше скршен дури во самиот финиш. Себастијан Спахиу ги доведе гостите во водство во 86-тата минута, а само две минути подоцна Ричард Ндзенге го потврди триумфот. Мечот го одбележа и црвениот картон на Ромарио Роналдо Вебстер во судиското надополнување, но тоа не ја расипа прославата на тетовци кои се насочуваат кон финалната битка за трофејот.
