Шестото коло во Евролигата донесе возбудливи кошаркарски пресметки во кои Реал Мадрид ја продолжи победничката серија совладувајќи го Асвел со 111:92, додека Партизан го претрпе третиот последователен пораз на гостувањето кај Фенербахче со 74:65.

Апсолутен јунак на вечерта во „Мовистар Арената“ беше Андрес Фелиз, кој го предводеше Реал Мадрид до третиот триумф по ред. Доминиканскиот плејмејкер одигра нереален натпревар, завршувајќи со 26 поени и дури осум погодени тројки од 11 обиди.

Иако Реал го диктираше ритамот и на полувреме замина со предност од 61:48, францускиот тим се врати во третиот период благодарение на Бесон и Боломбој, израмнувајќи на 71:71. Сепак, Маледон и Прадиља ја вратија контролата кај домаќините, а во последните десет минути Мадриѓаните постигнаа дури 34 поени за убедливи 111:92. Кај Асвел, кој сега има скор 2-4, најпрецизен беше Тајтај Вашингтон со 17 поени.

За разлика од Реал, белградски Партизан доживеа нов пад во играта и загуби на гостувањето во Истанбул од Фенербахче. Избраниците на Хуан Пењароја одлично го започнаа мечот, диктираа цврста одбрана и преку Томсон и Стивенс стигнаа до двоцифрена предност (18:7), за на пауза да заминат со позитива од 28:25.

Сепак, казната за пропуштените отворени шутови пристигна во третата четвртина, која се покажа како катастрофална за црно-белите. Шејвон Шилдс (17 поени) и Тејлен Хортон-Таркер (14 поени) го повлекоа Фенербахче, кој го доби овој период со неверојатни 34:16 и целосно го прекрши натпреварот. Партизан во финишот се обиде да се врати и намали на осум негатива, но немаше сили за пресврт.

Кај Партизан, кој по овој пораз има скор од 3-3, се истакнаа Томсон со 13, како и Хејс и Стивенс со по 12 поени. Вниманието на црно-белите сега се префрла на следното коло, каде што на домашен терен ги очекува вечното дерби против Црвена Звезда.