Роберто Мартинез се најде под сериозен притисок по ремито со ДР Конго. Португалија одигра очаен и комплетно јалов натпревар на Мундијалот. Поради тоа, шпанскиот стратег и Кристијано Роналдо се на мета на критичарите. Дополнителен хаос предизвикаа информациите за заминувањето на селекторот. Наводно, тој веќе преговара со Ал Наср за по завршувањето на шампионатот. Таквите шпекулации воопшто не му требаат на тимот во овој момент.

Легендарниот дански голман Петер Шмајхел жестоко удри по предводникот на Португалците. Тој смета дека Мартинез тврдоглаво форсира систем кој воопшто не функционира. Данската легенда не ја криеше својата иритација од одлуките на тренерот.

„Како можеш да ги оставиш Феликс и Леао на клупата? Португалија има премногу напаѓачки квалитет за ваква претпазлива игра. Тактиката на Мартинез е премногу конзервативна. Нема никаква креативност во нивниот напад. Средниот ред е целосно отсечен од офанзивната линија. Измените ги прави премногу доцна за да смени нешто. Вака ќе прокоцка уште една златна шанса за светска титула.“ -смета данецот.

Шмајхел со право стравува од нов неуспех на шпанскиот стратег. Мартинез претходно со години ја предводеше златната генерација на Белгија. Тој тогаш ги имаше Де Брујне и Азар во нивниот зенит. Сепак, Белгијците под негово водство никогаш не стигнаа до големо финале. Најголем успех му остана третото место на Мундијалот во Русија. Португалија сега се соочува со идентична опасност под негова команда.