Македонскиот вицешампион Шкендија ја продолжува својата европска авантура, откако со две убедливи победи успешно ја мина првата пречка во квалификациите за Конференциската лига. По високите 5-0 на првиот натпревар, тетовци вечерва ја потврдија доминацијата и на реваншот. Избраниците на Артим Положани славеа со минимални 1-0 против Европа од Гибралтар и со вкупни 6-0 обезбедија место во второто квалификациско коло.

Шкендија во текот на целиот натпревар имаше контрола врз играта и не му дозволи на противникот да се надева на пресврт. Наградата за добрата партија стигна во самиот финиш, кога Ване Крстевски во 86. минута ја затресе противничката мрежа и ја потврди втората победа во двомечот.

Тетовскиот состав на сигурен и убедлив начин ја заврши задачата против претставникот на Гибралтар и сега со многу самодоверба ќе го очекува следниот европски противник, тимот на Браво од Словенија.