Светот на тенисот е во шок откако Арина Сабаленка доживеа вистинско помрачување на „Филип Шатрие“. Првата носителка на турнирот го заврши својот настап во четвртфиналето, откако претрпе тежок пораз од 25-тата Дијана Шнајдер со 3-6, 7-5, 6-0. Со овој епски триумф, кој траеше нешто повеќе од два часа, 22-годишната Русинка стави крај на импресивната низа на Сабаленка од шест последователни полуфиналиња на Грен слем турнирите.

За Шнајдер ова беше дебитантско четвртфинале на најголемата сцена и нејзин прв меч во кариерата против актуелен светски рекет број еден. И покрај силниот ветер во Париз и огромниот притисок, младата тенисерка покажа челични нерви и стигна до најголемиот успех во кариерата – пласман во своето прво Грен слем полуфинале.

Ништо не навестуваше ваков исход откако Сабаленка рутински го доби првиот сет и поведе со убедливи 4-1 во вториот, имајќи два брејка предност. Тогаш се случи неверојатен пресврт. Левораката Шнајдер почна да погодува нереални винери од форхенд и влезе во страшна серија, освојувајќи 12 од следните 13 гема. Клучниот удар го зададе при негатива од 3-5 во вториот сет, по што врза неверојатни 10 гема по ред за тотален триумф.

Од друга страна, играта на Сабаленка целосно се распадна. Првата фаворитка ја загуби контролата врз своите удари и натпреварот го заврши со дури 57 неизнудени грешки, од кои дури 17 беа во катастрофалниот трет сет (6-0). Ова е прв „велосипед“ (сет загубен со нула) за Сабаленка уште од почетокот на 2024 година, кога на сличен начин загуби од Дона Векиќ во Дубаи.

За Шнајдер, која веќе има пет WTA титули во својата витрина, ова е само втора победа над топ-10 тенисерка во 16 обиди, а прва по триумфот над Коко Гоф во Торонто пред две години.