Само една недела по освојувањето на домашното првенство, фудбалерите на Селтик стигнаа и до трофејот во националниот Куп. Избраниците на Мартин О’Нил без поголеми проблеми го совладаа второлигашот Данфермлајн со убедливи 3-1, со што и официјално го заверија својот 14-ти историски дабл.

Шампионот доминираше уште од самиот старт. Даизен Маеда го отвори резултатот во 19′ минута со атрактивен лоб удар, а предноста ја дуплираше Арне Енгелс во 36′ минута за сигурни 2-0 на полувремето. Точка на сите дилеми стави Келечи Ихеаначо во 73′ минута по одличен соло-продор, додека поразот на аутсајдерот во финишот го ублажи Џош Купер. Овој триумф донесе уште еден голем јубилеј за 74-годишниот стратег Мартин О’Нил, кој ја прослави својата трета двојна круна на клупата на гигантот од Глазгов.