Тренерот Гоце Седлоски не го криеше задоволство по освоениот шампионат со Вардар. Сега, како што порача тој самиот, го напушта колективот со убави спомени. Во неговиот мандат го освои купот, а денеска ја завери и титулата првак на Македонија со Вардар.

Седлоски порача дека од денес е максимално фокусиран на репрезентацијата на Македонија, каде што ја извршува улогата на селектор.

„Најголемите заслуги за овој успех им припаѓаат на фудбалерите. За година и половина тука освоивме и Куп и титула, па останува само мал жал што уште оваа сезона не стигнавме до двојната круна. Кога ќе погледнеме каде беше Вардар кога дојдов и каде е денес, овој трофеј е целосно заслужен плод на трудот на играчите и управата.

Од денес повеќе не сум тренер на Вардар. Момците дадоа сè од себе за мене и затоа оваа разделба ми паѓа тешко. Им посакувам многу среќа во иднина на нив и на мојот наследник, со желби за добри резултати во Европа, а веќе следната сезона клубот да ја освои двојната круна“, истакна Седлоски.