Репрезентативните собири за време на мајските и јунските термини отсекогаш биле идеална можност за селекторите да го проверат потенцијалот на домашниот шампионат и да им дадат шанса на некои нови, свежи сили. Кога националниот тим се соочува со сериозен бран на повреди и оправдани отсуства, тогаш вратата на репрезентацијата ширум се отвора за фудбалерите кои блеснаа на македонските терени изминатава сезона. Токму со комбиниран состав и неколку изненадувања, нашиот национален тим ќе ги тестира силите против два исклучително квалитетни противници на гостински терен.

Предводникот на македонската А репрезентација, Гоце Седлоски, го соопшти финалниот список од 27 фудбалери на кои ќе смета за претстојните пријателски пресметки против Босна и Херцеговина (29 мај во Сараево) и селекцијата на Турција (1 јуни во Истанбул).

Во овој контингент, Седлоски реши да им укаже доверба на дури петмина дебитанти кои за првпат ќе го почувствуваат репрезентативниот дух. Меѓу новите имиња се дефанзивецот на романска УТА Арад, Дин Аломеровиќ, десниот бек на Вардар, Георгије Јанкулов, дуото од средниот ред на Силекс, Дарко Анѓелески и Дарко Додев, како и најефикасниот напаѓач на „црвено-црните“, Азер Омерагиќ.

Од друга страна, кормиларот на Македонија се соочи со сериозни главоболки при составувањето на тимот. Поради незгодни повреди, надвор од комбинација за овие два меча се Љупче Дориев, Лука Станковски, Егзон Бејтулаи, Марио Илиевски и Димитар Митровски, додека поради неодложни клупски ангажмани овој репрезентативен прозорец ќе го пропуштат Тихомир Костадинов и Андреј Стојчевски.

Првиот собир на „рисовите“ е закажан за 25 мај во хотелот „Хилтон“ во Скопје, каде што ќе започнат мини-подготовките пред летот за Сараево.

ГОЛМАНИ: Столе Димитриевски (Валенсија), Дамјан Шишковски (Борац Бања Лука), Давор Талески (Вардар);

ОДБРАНА: Ѓоко Зајков (Ајман), Висар Муслиу (Ст. Труден), Никола Серафимов (Левски), Дин Аломеровиќ (УТА Арад), Езѓан Алиоски (Лугано), Јован Манев (Нови Пазар), Имран Фетаи (Шкендија), Себастијан Ерера (Борац Бања Лука), Стефан Деспотовски (ОФК Београд), Дарко Велковски (Вардар), Георгије Јанкулов (Вардар);

СРЕДЕН РЕД: Елиф Елмас (Наполи), Енис Барди (Коњаспор), Бобан Николов (Вардар), Јани Атанасов (АЕЛ Лариса), Агон Елези (Сараево), Сефер Емини (Сондерјиске), Дарко Анѓелески (Силекс), Дарко Додев (Силекс);

НАПАД: Бојан Миовски (Глазгов Ренџерс), Дарко Чурлинов (Коџаели), Елмин Растодер (Тун), Азер Омерагиќ (Вардар), Милан Ристовски (Бохемијанс);