Фелипе Кутињо го забележа својот долгоочекуван деби-настап во црно-белиот дрес на Сантос, помагајќи му на својот нов тим да стигне до голем пресврт и триумф од 2-1 против Сао Пауло во заостанатиот меч од 21. коло во бразилското првенство. Иако Нејмар го пропушти овој дуел, неговиот нов клупски колега ги одигра сите 45 минути во второто полувреме и веднаш го потврди својот квалитет.

Натпреварот започна подобро за домашниот состав на Сао Пауло, кој дојде до водство во 34. минута. По подолга ВАР-проверка, судијата покажа на белата точка поради влечење на Лукас Верисимо, а сигурен реализатор на пеналот беше Лусијано. Сепак, домашната радост траеше кратко, само две минути подоцна Габриел Барбоса го искористи одличното центрирање на Гонсало Ескобар и го израмни резултатот на 1-1 со својот 22-ри гол во шампионатот.

Клучниот момент се случи на паузата меѓу двете полувремиња, кога во игра влезе поранешниот фудбалер на Ливерпул, Барселона и Бајерн Минхен. Кутињо одигра речиси непогрешливо во дистрибуцијата на топката (18/19 успешни пасови), а директно ја режираше и акцијата за победа. Со елегантен прием исфрли еден противнички играч и испрати перфектна топка во простор за Евертон, кој веднаш го пронајде Габигол за запечатување на големиот пресврт.

Со овој важен триумф, Сантос се искачи на седмото место на табелата со 31 бод и ја продолжи потерата по петтопласираната Баија во борбата за позициите кои носат пласман во квалификациите за Копа Либертадорес, додека Сао Пауло останува на 11. позиција која води во Копа Судамерикана.