Борусија Дортмунд обезбеди пласман во следната фаза од ДФБ-покал купот откако во драматична пресметка го совлада Вердер Бремен со 3:2 на „Сигнал Идуна Парк“. Избраниците на Нико Ковач одново прокоцкаа комотно водство од 2:0, но Марсел Сабицер во третата минута од судиското надополнување го спречи целосниот пресврт и го реши победникот пред влегување во продолженија.

Дортмунд тргна фуриозно и за само 17 минути создаде двојна предност. Серху Гираси го отвори резултатот во 6. минута по одличната акција на Бајер и Риерсон, а во 17. минута Карни Чуквуемека на асистенција со глава од Џоб Белингам зголеми на 2:0. Домаќините имаа целосна контрола и уште неколку зрели шанси преку Нмеча за предвреме да го запечатат мечот.

Сепак, второто полувреме донесе реприза на првенствениот дуел одигран пред 18 дена. Резервистот и поранешен напаѓач на Дортмунд, Никлас Филкруг, ја шокираше домашната публика за само три минути. Најпрво во 65. минута реализираше пенал по прекршокот на Риерсон, а веќе во 68. минута му ја одзеде топката на Антон и ладнокрвно го совлада Кобел за 2:2.

Кога Вердер беше во психолошка предност и се чинеше дека натпреварот оди во продолженија, следуваше одлучувачкиот момент во 93. минута. Марсел Сабицер изведе перфектен слободен удар, ја искористи лошата поставеност на голманот Карл Хајн и со разорна дијагонала ја затресе мрежата за конечни 3:2 и олеснување на трибините во Дортмунд.