Карлос Алкараз со убедливи 3-0 во сетови (6-4, 6-4, 6-4) ја започна својата кампања на УС Опен, совладувајќи го Роман Сафиулин по два часа и 22 минути игра. Иако Шпанецот се врати на теренот по пауза поради повреда и имаше мали осцилации во играта, сепак покажа класа кога беше најпотребно.

Сафиулин даде силен отпор во сите три сета, а во вториот дури и отвори со водство од 2-0, но Алкараз веднаш го врати брејкот и ја презеде контролата. Клучните разврски се случуваа во седмите гемови од првите два сета каде што Шпанецот го кршеше отпорот на ривалот. Во третиот сет Алкараз спаси три брејк-топки на свој сервис, по што брзо направи одлучувачка предност и рутински ја запечати победата. Негов следен ривал во второто коло ќе биде Португалецот Фарија.

Паралелно со случувањата на терените во Њујорк, главна тема на турнирот е и суспензијата на Ник Кирјос поради позитивен тест на кокаин. Свој коментар за скандалот даде Стефанос Циципас, кој отворено призна дека оваа вест воопшто не го изненадила.

„Да бидам искрен, знаев за ова уште пред да биде јавно објавено. Го познавам лично и, ако мора да кажам вистина, ваквиот развој на настаните донекаде беше и очекуван. Единствено ме изненадува што тоа се случи дури сега“, изјави Циципас, кој ја продолжува трката во Њујорк со мечот од второто коло против Харис од Јужна Африка.