Додека ги финализира преговорите за доаѓањето на Родри, спортскиот сектор на Барселона неочекувано му одобри позајмица на Роналд Араухо во редовите на Ливерпул. Уругвајскиот дефанзивец и еден од капитените на каталонскиот тим заминува за Англија, а според информациите од Островот, „црвените“ обезбедија и право на целосен откуп на неговиот договор на крајот од сезоната.

За Ливерпул ова е експресно решение за дефанзивната линија по заминувањето на Ибрахима Конате и зачестените проблеми со повреди кај останатите дефанзивци. Араухо носи огромно искуство на големата сцена, а за премиерлигашот ќе биде важна опција и поради фактот што покрај стоперската позиција, успешно може да покрие и како десен бек.

Преселбата во Англија е шанса за Уругваецот да го врати препознатливиот континуитет по турбулентната сезона во која пропушти голем дел од натпреварите поради повреди, додека за Барселона ова е одлична можност да го растовари ростерот и буџетот за плати пред одбраната на титулата во Ла Лига.