Еден од најзвучните летните трансфер пресврти го донесе Шпанецот Родри во редовите на Барселона, иако речиси целата фудбалска јавност го очекуваше неговиот потпис за Реал Мадрид. По неколкунеделно молчење, новиот лидер во средниот ред на Каталонците конечно ја откри вистината зад својот избор во интервју за „Мундо Депортиво“, демантирајќи ги шпекулациите дека одлуката имала каква било врска со минатогодишниот бојкот на Реал на церемонијата за „Златната топка“.

„Тоа апсолутно не влијаеше врз мене. Беше тоа мој посебен ден и немаше потреба да се занимавам со луѓе кои не беа присутни на церемонијата. Сите што ме познаваат знаат дека се обидувам да се држам подалеку од медиумскиот циркус и дека сум фокусиран исклучиво на фудбалот“, порача 30-годишниот шпански репрезентативец.

Родри призна дека не било нималку едноставно да ги одбие Мадриѓаните, кои имале исклучително коректен однос кон него, но спортскиот проект во Каталонија се покажал како пресуден фактор за неговата иднина.

„Кога ве бараат двата најголеми клуба во светот, пред вас е одлука од огромна важност. Водечки мотив ми беа исклучиво спортските причини, каде можам повеќе да напредувам и да освојувам трофеи. Воопшто не беше лесно да му се каже ‘не’ на Реал Мадрид, но на крајот ме убедија програмата на Барселона и тоа што ми го претставија Деко и Ханси Флик“, открива искусниот фудбалер.

Тој потврди и дека имал директен разговор со Жозе Мурињо, кој летово се врати на клупата на Реал Мадрид од Бенфика. Според Родри, комуникацијата била на исклучително високо ниво, а по донесувањето на конечната одлука лично му се јавил на португалскиот стратег за да му се заблагодари за покажаниот интерес и професионалниот однос.

Барселона за неговиот потпис му плати 60 милиони евра на Манчестер Сити, со можност за дополнителни 15 милиони преку бонуси. Иако неговото брзо вклопување ги крена апетитите на навивачите за освојување на Лигата на шампионите, Родри сепак ја смирува еуфоријата.

„Јасно е дека сите сме доведени за највисоки дострели, но во Лигата на шампионите не победува секогаш најдобриот. Шансите постојат и трофејот е достижен за Барселона, но сметам дека сè уште не сме фаворити. Мора да бидеме свесни што е потребно за да се стане шампион и каде треба уште да се подобриме“, заклучи шпанскиот велемајстор.