Иако Португалија важи за еден од главните кандидати за највисок пласман на Светското првенство, селекторот Роберто Мартинез нема да остане на кормилото на оваа репрезентација по завршувањето на турнирот, без оглед на остварениот резултат. Според информациите на дел од британските медиуми, шпанскиот стратег веќе донел дефинитивна одлука да не ја продолжи соработката со Фудбалската федерација на Португалија, со што неговата епизода на клупата на „селесао“ дефинитивно завршува летово.

Мартинез ја презеде репрезентацијата во 2023 година како наследник на Фернандо Сантош, а во текот на својот мандат успеа да го донесе трофејот од Лигата на нации, совладувајќи ја Шпанија во големото финале. Неговото менаџирање со тимот се поклопи со последното големо мундијалско поглавје во кариерата на Кристијано Роналдо, со кого Португалците влегуваат со огромни амбиции на овој шампионат, иако сега е јасно дека по турнирот следува ера на реорганизација.

По заминувањето од селекторската функција, Мартинез планира сериозно да ги разгледа понудите од англиската Премиер лига, која наводно е негова примарна желба за продолжување на кариерата, иако за неговите услуги постои отворен интерес и од неколку други силни национални селекции.