Полскиот голгетер Роберт Левандовски официјално соопшти дека го напушта каталонскиот гигант претстојното лето. Искусниот 37-годишен напаѓач одлучи да не го продолжи договорот со клубот по четири успешни сезони.

Левандовски се збогуваше со фановите преку емотивно видео на социјалните мрежи. Тој истакна дека заминува со исполнета мисија и три освоени трофеи во Шпанија. Полјакот упати и посебна благодарност до претседателот Жоан Лапорта за укажаната доверба.

„По четири години, полни со предизвици и напорна работа, време е да продолжам понатаму. Заминувам со чувство дека мисијата е исполнета. 4 сезони, 3 титули. Никогаш нема да ја заборавам љубовта што ја добив од навивачите уште од моите први денови во клубот. Каталонија е моето место на Земјата. Ви благодарам на сите што ги запознав по патот во текот на овие прекрасни четири години. Посебна благодарност до претседателот Лапорта што ми даде можност да го живеам најневеројатното поглавје од мојата кариера. Барса се врати таму каде што припаѓа. Да живее Барса. Да живее Каталонија“. – стоеше во објавата на Левандовски.

За време на четиригодишниот престој, тој одигра 191 натпревар во сите конкуренции. Искусниот стрелец постигна 119 голови во дресот на каталонскиот клуб. Левандовски пристигна во Каталонија во 2022 година и веднаш стана миленик на публиката.

Од наредната есен, еден од најдобрите напаѓачи на денешницата ќе има нов предизвик во кариерата. Навивачите на Барса долго ќе ги паметат неговите мајстории и клучните погодоци.