Селекторот на Бразил, Карло Анчелоти, започна да ја гради новата ера на „Селесао“ по разочарувачкиот настап на Светското првенство во САД, Канада и Мексико, каде што бразилската репрезентација беше елиминирана уште во осминафиналето од селекцијата на Норвешка. И покрај серијата критики во јавноста, италијанскиот стручњак ја задржа довербата на раководството на федерацијата и доби целосна слобода да направи радикални промени со поглед кон Копа Америка 2028 и Мундијалот во 2030 година.

Првиот тест за новиот состав ќе бидат пријателските натпревари против Австралија и Индија, а Анчелоти за овој собир направи сериозен рез во екипата. Покрај заминувањето на Нејмар, репрезентативната кариера ја завршија и искусните Данило, Каземиро, Фабињо, Алекс Сандро, како и голманите Алисон и Едерсон. Дополнително, на новиот список не се најдоа ниту Матеус Куња, Игор Тијаго и Лукас Пакета, со што вкупно 16 фудбалери кои беа дел од мундијалскиот состав овојпат останаа надвор од комбинација.

На списокот од 26 фудбалери се наоѓаат дури осум дебитанти, Педро Мориско, Отавио, Артур Дијас, Жаир Куња, Матеузињо, Мауро Жуниор, Брено Бидон и Габриел Бонтемпо, а во репрезентацијата се вратија и младите Естевао, Андреј Сантос и Жоао Педро. Главен товар и улога на лидери во оваа реновирана селекција ќе имаат искусните Винисиус Жуниор, Рафиња и Маркињос, додека закажаните контролни дуели против Австралија ќе се одиграат на 25 и 29 септември, по што следи и мечот против Индија на 3 октомври.

🇧🇷 | Carlo Ancelotti called up the NEW Brazil squad today.

What do we think?💭 pic.twitter.com/2vnDfT9v6p

— AllThingsBrazil™ (@SelecaoTalk) September 9, 2026