Релито Дакар во 2027 година ќе добие поинаква географска мапа. По седум години во Саудиска Арабија, најтешкото рели во светот се враќа во Африка, а авантурата ќе започне во Португалија.

Организаторите од АСО потврдија дека следното издание ќе се одржи во Португалија и Мароко. Одлуката доаѓа по откажувањето на планираната трка во Саудиска Арабија, поради безбедносни ризици.

Алгарве ќе биде домаќин на стартот и првата специјална етапа. Потоа караванот ќе се пресели во Мароко, каде што ќе бидат организирани уште 11 специјални етапи. Предвиден е и ден за одмор во Агадир, а трасата ќе ја опфати земјата од север кон југ.

👇 Dakar 2027 official route
🗓️ 9th – 23rd January 2027
🚩 Loulé/Faro – Marrakech 🏁
🗺️ 7,824 km (4,341 km of SS)

🔜 #Dakar2027 https://t.co/gi4Ltw9luv

— DAKAR RALLY (@dakar) October 30, 2026

Иако првично беше планирано натпреварувањето да се одржи од 1 до 15 јануари, новите датуми се од 9 до 23 јануари 2027 година. Промената доби одобрение од Меѓународната автомобилска федерација (ФИА).

Според објавените планови, натпреварувачите ќе поминат вкупно 7.824 километри. Од нив, 4.341 километар ќе бидат специјални етапи, на рутата од Луле-Фаро до Маракеш.

„И покрај краткиот период за подготовка, успеавме да создадеме вистинско рели Дакар“, изјави директорот на натпреварувањето, Давид Кастера.

Враќањето во Мароко има и историско значење. Рели Дакар последен пат се одржуваше во Африка во 2008 година, пред безбедносните проблеми да доведат до негово преселување во Јужна Америка.

Од 2020 година, натпреварувањето се одржуваше во Саудиска Арабија. Следната година, пак, организаторите најавуваат уште едно посебно издание. Јубилејното 50. издание во 2028 година треба повторно да се врати во Саудиска Арабија.

Првото издание на легендарното рели се одржа во 1978 година. Тогаш караванот тргна од Париз, помина низ Сахара и заврши во сенегалскиот главен град Дакар. Со децении, трката го носи статусот на едно од најсуровите и најпредизвикувачките моторспорт натпреварувања во светот.