Додека шпекулациите го поврзуваа Лос Анџелес со неколку други имиња, раководството на Лејкерс го повлече првиот конкретен потег летово. Нов член на тимот од Калифорнија е дефанзивниот специјалист Матис Тајбул, кој договори едногодишна соработка вредна 3,3 милиони долари.

Клучната улога во доаѓањето на Австралиецот ја имаа тренерот Џеј Џеј Редик и првата ѕвезда Лука Дончиќ. Тие лично му го претставиле планот на клубот и точно дефинираната улога што го чека на паркетот. Тајбул пристигнува како слободен играч откако Портланд му нудеше исклучиво негарантирани договори, а обидот за „сајн-енд-трејд“ меѓу двете екипи пропадна.

Станува збор за двократен член на втората најдобра дефанзивна петорка во НБА лигата. Иако поради проблеми со повреди одигра само 45 натпревари во последните две години, Тајбул имаше одличен процент на шут за три поени (41,8%). Минатата сезона за Блејзерс во просек минуваше само 16 минути на теренот, но и тоа му беше доволно за две украдени топки по натпревар, завршувајќи како лидер во лигата по комбинација од украдени топки и блокади пресметани на 36 минути.

Со овој трансфер Лејкерс стигнаа до 16 играчи со гарантирани договори, но тоа нема да биде сè. Раководството и понатаму ги следи опциите за ангажман на Ник Ричардс, Џонатан Куминга и Пи Џеј Вашингтон, со цел додатно да се засили тимот околу Дончиќ пред почетокот на новата сезона.