Екипата на Комо, која минатата сезона направи вистинска сензација во италијанскиот фудбал и избори историски пласман во Лигата на шампионите, вечерва од 20:45 часот му гостува на тимот на Џенова на стадионот „Луиџи Ферарис“ во првиот натпревар од третото коло во Серија А.

Избраниците на Сеск Фабрегас ги потврдија високите амбиции уште во минатото коло, кога славеа на гостувањето кај Наполи со 2:1 благодарение на головите на Мартин Батурина и Анастасиос Дувикас. Богатите сопственици, браќата Мајкл и Роберт Хартоно, успеаја да ги задржат сите клучни играчи како Аргентинецот Нико Паз и Батурина, а тимот дополнително го засилија со познати имиња како Тревор Чалоба и голманот Роберт Санчез од Челси, Моиз Кин од Фиорентина, како и бековите Јан Куто и Каики.

За Комо овој дуел претставува и генерална проба пред историското деби во Лигата на шампионите в четврток против РБ Лајпциг. Во одлична форма се наоѓа грчкиот напаѓач Дувикас, кој доколку се запише во стрелците вечерва, ќе стане првиот фудбалер во Серија А со гол на шест последователни гостувања уште од времето на Виктор Осимен во 2023 година.

Од друга страна, Џенова се наоѓа во сериозна криза. Предводникот на домашните, Даниеле Де Роси, е под голем притисок откако неговиот тим ги загуби првите два меча без постигнат гол. Доколку претрпат нов пораз, за Џенова тоа ќе биде најлош старт во првенството уште од далечната сезона 1957/1958. Во самиот финиш од преодниот рок, тие го доведоа Робињо Јуниор од Сантос, кој се очекува мечот да го започне од клупата за резерви.

Традицијата е на страната на Комо, кој нема претрпено пораз од Џенова на последните четири меѓусебни средби во елитното друштво.