Возачот на Мерцедес, Џорџ Расел, го постави најбрзото време на првиот ден од акцијата за Големата награда на Италија на легендарната патека во Монца, 13-та трка во овогодишниот шампионат на Формула 1.

Британецот го комплетираше најбрзиот круг на вториот слободен тренинг со време од 1:22.559 минути, што беше за 12 стотинки подобро остварување од она на Шарл Леклер со Ферари, кој беше најбрз на претпладневната сесија. Најблиску до водечката двојка беше вториот возач на Мерцедес и миленик на домашната публика, Кими Антонели, со заостанување од само 141 илјадитинка зад својот тимски колега.

Откако на првиот тренинг во центарот на вниманието беа возачите на Ферари, Леклер и Луис Хамилтон, во попладневниот термин тимот на Мерцедес ја презеде контролата на патеката. И покрај тоа што Леклер, Хамилтон и Франко Колапинто имаа излетувања надвор од патеката, тренингот мина без потешки последици.

Зад водечката тројка се пласираше бранителот на титулата Ландо Норис, по што следеа Хамилтон, Оскар Пиастри, Арвид Линдблад, Оли Бирман, четирикратниот светски шампион Макс Ферстапен и Јуки Цунода, кој настапува за Рејсинг Булс на местото на Лиам Лосон, додека Новозеланѓанецот го менува повредениот Исак Хаџар во тимот на Ред Бул.

Возбудувањата во Монца продолжуваат утре со третиот слободен тренинг од 12:30 часот и квалификациите закажани за 16:00 часот, додека трката за Големата награда на Италија стартува в недела од 15:00 часот.